11-июлда Кемин районунун Шабдан айылындагы Чоң-Кемин ат майданында сейрек кездешүүчү жаныбарларды коргоого, экологиялык билим берүүнү өнүктүрүүгө жана туруктуу экологиялык туризмди жайылтууга арналган «Илбирс ЭкоФест – 2026» аттуу ири экологиялык фестиваль өттү.
Фестивалдын алкагында экологиялык мастер-класстар жана көргөзмөлөр, жаш дизайнерлердин катышуусундагы «BARS FASHION 2026» мода көрсөтүүсү, ошондой эле жаратылышка аяр мамиле жасоону жайылткан балдар жана чоңдор үчүн ар түрдүү интерактивдүү иш-чаралар уюштурулду.
Фестивалдын жыйынтыгында академик К. Карасаев атындагы Бишкек мамлекеттик университетинин экология жана менеджмент факультетинин студенттери өздөрүнүн жогорку даярдыгын жана чыгармачылык мүмкүнчүлүктөрүн көрсөтүп, I орунду татыктуу багындырышты.
Студенттерибизди жеңиши менен чын жүрөктөн куттуктап, алдыдагы окууларында жана экологиялык демилгелеринде мындан аркы ийгиликтерди каалайбыз!